I dette seminaret vil vi ta føre oss dei viktigaste prinsippa for og årsakene til grammatiske endringar, særleg i  syntaks og morfosyntaks. Språkendringar skuldast dels ytre påverknad (språkkontakt) og språkinterne faktorar. Viktige føresetnader for å forstå språkhistoriske endringar er spørsmål omkring språklege universalium, forholdet mellom skrift og tale, filologiens rolle, og generelle grammatiske prosessar som grammatikalisering, analogi, reanalyse, sykliske endringar osv. Slike faktorar kan forklare ein del generelle endringar som vi kan observere i ulike språkgrupper og -familiar, t.d. ordstilling, bruk av bøyingsmorfologi, argumentstruktur, side- og underordning. 

​

Seminaret vil bestå dels av diskusjon av teoretisk litteratur, og dels av studium av eldre og yngre tekstar. Målet er at den teoretiske diskusjonen i størst mogleg grad skal vera basert på historiske tekstar. Eit anna mål er at teksttilfanget skal vera så mangfoldig som råd. Det er naturleg at mykje av tilfanget kjem frå språk med ei vel dokumentert og utforska historie, som t.d. gresk, latin og romansk, germansk, og semittiske språk. Men vi vil gjerne trekke inn flest mogleg andre språk, òg, så folk som arbeider med andre språk, er svært velkomne til å delta og bidra.